Sempre, mentre che io ho di ricordo, o e' si fece guerra, o e' se ne ragionò; hora se ne ragiona, di qui a un poco si farà, et quando la sarà finita, se ne ragionerà di nuovo, tanto che mai sarà tempo a pensare a nulla (...).
N. Machiavel, Lettera à Guicciardini (Firenze, gennaio 1525)
L’Alimani in ritirata aviani
suminatu i danni. I partighjani chì l’aviani vulsuti parà à a Bucca di Laronu
s’erani trovi à scappà com’è cunìgliuli, chì i so tiri di sten o di fucil di
caccia erani senza effettu annant’à l’armatura di i tank. In a fucilata,
parichji patriotti erani stati tumbi, è unu, ch’ùn avia avutu u tempu di
fughja, s’era piattu in un tafonu sutt’à a strada, unu spezia di regard
invaditu di lamaghja. I suldati alimani fecini i fieri un certu tempu,
vistichendu cù a smorfia di u triunfadori u tarrenu di a so vittoria. Da i
scialbali chì duminaiani a strada, caccioni sevi o setti catàvari, è i
stracquoni longu à u catramu, com’è ch’iddi avissini infilaratu i so truffei di
caccia. U partighjanu piattu intesi calchì raspiu di suffrenza, calchì sugnozzu
ch’ùn pudia vena chè da un fertu. Po’ una rivulvarata, è più nudda, s’iddi ùn
erani i scaccanati di i suldati. I mutora ricummincioni à ruzà, à mezu à i
brioni di l’ufficiali, è a truppa si rimissi in istrada, à chì annant’à i
camiò, à chì annant’à i tank direttamenti. Vicinu ad iddu, ghjustu subra, un
suldatu briunò calcosa à i cumpagni chì s’alluntanaiani. È in u mentri chì u
stolu numicu attaccaia i ghjirati da subra à Laronu, u ritardatariu, micca più
inchietu chè quissa, s’avvicinò da u cantu di a strada pà sbraghittassi.
Tranquillu com’è Battistu, l’Alimanu si missi à piscià in u regard indu ch’era
piattu u risistanti, senza vèdalu. Quiddu si ricivia tuttu u pisciu in coddu, è
mancu a vulia creda. Circhendu di firmà u so rispiru, d’ùn lacà micca sbuttà
una tussi chì l’avaria pussutu tradiscia, si dicia trà iddu stessu chì fin
tantu chì u bosciu ùn lu vidia era acqua biniditta. È da veru u suldatu ùn lu
vidia, è pisciaia, senza dubbità chì la facia annant’à un fughjittivu appappatu
quì da suttu. Era una situazioni insuppurtèvuli pà u risistanti, umilianti ben
sicura, chì dopu à a concia chì l’Alimani viniani di metta à i so cumpagni,
iddu era quì impauritu, ingrunchjatu in u so tafonu, prighendu par chì u so
vincidori ùn lu rimarchessi, è l’altru chì si sbiutaia annant’ad iddu, oramai
solu quì à mezu à i stucci di i cartucci è i catàvari di i ribeddi scuncassati,
ed era talmenti praputenti, talmenti sicuru ch’ùn avia più nienti à tema,
ch’iddu ùn paria mancu di pudè pinsà ch’un numicu scampatu li pudissi sempri fà
pagà u prezzu di a ghjurnata. Pisciaia annant’à u tintu partighjanu è a si
frisciaia com’è ch’iddu fussi statu à l’arrestu mentri una pruminata di quiddi
buccòlichi. Da sutt’à a funtan di pisciu, u disgraziatu si vidia in a pusizioni
di u ricciu quand’iddu si faci piscià à dossu da a vulpi. À u sintimu di
vigliaccumu ch’iddu risintia, vinia à buliassi quiddu di a vargugna. Po’
l’Alimanu si scuzzulò a piscina, feci ricuddà a so braghetta è s’alluntanò
nant’à a strada à passi tranquilli. U partighjanu l’intesi chì infurcaia una
mascina è chì pruvaia di fà dimarrà un mutori. Capisti di colpu chì u
pisciadori era un suldatu cù una motò, è ch’iddu s’era pirmissu di firmà solu
daretu à a truppa sapendu chì la richjapparia senza prublemu. Erani soli tutti
è dui, iddu è ‘ssu maghjali chì l’avia pisciatu à dossu è ch’avia tumbu i so
cumpagni, è avali quidd’altru s’appruntaia à parta cù a so motò è à spariscia
par sempri da a so vita. Da quì à pocu saria salvu, pudaria ricummincià à rispirà.
Piddaria i violi è si ni riintraria in casa soia com’è chì nudda fussi mai
esistutu, nè l’occupazioni nè nudda, o allora piddaria a machja sin’à a fin di
a guerra, smintichendu a risistenza è i liti di i so sìmuli. Po’ si rividisti
ingrunchjatu à modu zòtticu, cù u pisciu chì li falaia longu à u tuppizzu dui
minuti nanzi, risintia torra quidda vargugna, è a còllara. Era vigliaccu è
s’appruntaia à lacà parta l’assassinu di i so amici, solu filici di salvà u so
coghju. Appressu tuttu, ùn c’erani più i tank è u grossu di a truppa alimana,
ùn firmaiani quì chè iddu è ‘ssu motociclistu spinsiratu. Si ricuttisti, è si
dissi nò, mi dà po’ l’occasioni. S’e’ u lacu parta socu l’ùltimu di l’ùltimi.
A motò era ghjà in marchja
quandi u risistanti surtisti da a so tana. L’Alimanu, accupatu à dà un pocu di
vitezza à a so miccànica chì suffria à attaccà a cuddata, vidisti sbuccà un
dumoniu da i buttissi, ùn la crezzi mancu vera. Dui sicondi dopu, era in tarra,
cù a motò ch’era sbulata contr’à i cantona longu a strada, beddu più luntanu, è
u so agrissori li sciacciaia u capu contr’à u catramu, imbuffèndulu à cazzotti.
Pinsò di metta à mani à a so cinta pà chjappà a so pistola, ma u so bracciu ùn
arrispundia più, forsa ch’iddu s’era troncu mentri chì u salvàticu l’avia fattu
capulà, o allora era paratu da un vinochju di ‘ssu numicu sciutu da u
sprufundu. Dicisi di libarassi dendu una scuttussata cù tuttu u so corpu, ma
l’altru facia pesu, è a so energia paria doma, scuntraia un’ energia supiriori
chì avia dicisu d’ùn lintallu micca. Volsi briunà, ma s’avvidisti chì l’altru
l’avia intrutu un pugnu interu in fundu di a cannedda, è ch’iddu attuffaia
mentri chì u partighjanu, cù u so pugnu lìbaru, li truncaia a faccia pezzu à
pezzu.
C’era u silenziu, i morti
stracquati più luntanu, i vistighji d’una battaglia chì vinia di succeda, una
motò accidintata è i cartucci sempri caldi annant’à a strada, è c’erani i
muntagni, i cantoni è i licci pà soli tistimonii. È a sola cosa chì si sintia,
era u chjoccu di i cazzotti ch’un omu mittia in u muru di quidd’altru, cù tutta
a so ditarminazioni pà anniìntiscialu, pà trasfurmà in pappina ciò ch’era statu
un visu umanu. U silenziu, è u chjoccu di i cazzotti, è i raspii attuffati, ma
stridenti è addispirati, d’una vìttima ch’ùn pudia mancu libarà a so suffrenza
in un veru brionu. U risistanti pichjò un tempu longu, forsa più di cinqui
minuti, cinqui minuti sò un’ eternità sutt’à i colpa, pichjò a so rabbia,
pichjò a so siti di vindicanza, pichjò tutta a so stizza sin’à essa sicuru chì
u capu di l’Alimanu ùn era più nudda, chè un pezzu di carri pista è macinata.
Quand’iddu
ebbi finitu a so faccenda, lacò annant’à u catramu un corpu d’omu senza capu, è
s’infrugnò in i machjona pà spariscia da a Stodia. Vinia di tumbà un omu, u
primu omu di a so vita, è nimu li daria mai una midadda par quissa, è
d’altrondi ùn si ni vantaria micca, ùn la cuntaria mai chè in u bughju di
l’attrachjata, à cumpagni ìntimi, a diciaria senza fiertà, cù una boci ciunca,
miccànica, solu pà riapra una piaca u tempu di risaldalla, a diciaria trà dui
bichjera d’acqua vita, è a so moglia risirvaria u caffè à st’òmini sìmplici,
senza pratesa, chì sani chì l’eroi ùn esistini micca, è chì a vita hè dura, è
chì sani ch’un omu si tumba par via di a paura, è di l’odiu, è di u vigliaccumu,
è di u disideriu di rivìncita, è di i sìntimi i più bassi chì impastani u pocu
chì no semu.
Marcu Biancarelli
Illustrazioni : Paolo Ucello, La bataille de San Romano (détail).
